კომბინირებული ტრანსდერმალური პლასტირები

ტრანსდერმალური თერაპიული სისტემა (TTS) არის დრეკადი, ჰორმონების შემცველი, კანზე მისაკრავი კონტრაცეფციული საშუალება. პლასტირები შეიცავენ ჰორმონებს – პროგესტინსა და ესტროგენს (ნორელგესტრომინი +ეთინილესტრადიოლი), მათი შეღწევა სისხლში ხდება კანიდან.

მეთოდის ეფექტურობა საკმაოდ მაღალია; ტრანსდერმალური თერაპიული სისტემა (TTS) აფერხებს ჰიპოფიზის გონადოტროპულ ფუნქციას, აფერხებს ფოლიკულის განვითარებას და ერევა ოვულაციის პროცესში. კონტრაცეპტული მოქმედება ძლიერდება საშვილოსნოს ყელის ლორწოს სიბლანტის მატებით და ბლასტოციტის მიმართ ენდომეტრიუმის მგრძნობელობის შემცირებით. პერლის ინდექსი – 0,90.

მაქსიმალური კონტრაცეპტული ეფექტის მისაღწევად, საჭიროა ტრანსდერმალური თერაპიული სისტემის (TTS) გამოყენების ინსტრუქციის მკაცრი დაცვა.
ერთდროულად შეიძლება გამოყენებულ იქნას მხოლოდ ერთი ტრანსდერმალური
პლასტირი.

პლასტირის მოთავსება რეკომენდებულია მენსტრუალური ციკლის პირველ,
მე -8 და მე -15 დღეს. ციკლის 22-დან 28-ე დღემდე (მე -4 კვირის განმავლობაში) – ტრანსდერმალური პლასტირი არ გამოიყენება.

გამოყენებული ტრანსდერმალური პლასტირი (TTS), დაუყოვნებლივ უნდა შეიცვალოს ახალი პლასტირით კვირის იმავე დღეს (ე.წ. “ჩანაცვლების დღეს”).
ახალი კონტრაცეპტული ციკლი იწყება მე -4 კვირის დასრულების მეორე დღეს;
პლასტირიის (TTS) გამოყენებისას, 7 დღეზე მეტი ხნის განმავლობაში შესვენება არ შეიძლება. წინააღმდეგ შემთხვევაში, ორსულობის რისკი იზრდება.

გამოყენების რეჟიმი:

TTS პლასტირი, ქალს შეუძლია დაიკრას სუფთა და მშრალ კანზე, სხეულის სხვადასხვა მიდამოში. კერძოდ, მუცლის ან დუნდულოების ზედაპირზე, მხრის ზედა გარეთა ზედაპირზე, ისევე როგორც ზურგის მიდამოებში.
სასურველია შეირჩეს თმის მინიმალური ზრდის ისეთი ადგილი, სადაც არ ხდება კონტაქტი მჭიდრო ტანსაცმელთან.
შესაძლო გაღიზიანების თავიდან ასაცილებლად, ყოველი შემდეგი პლასტირი (TTS) თავსდება კანის ახალ უბანზე, მაგრამ ზუსტად ზემოთაღნიშნულ ანატომიურ მიდამოებში.
დაუშვებელია პლასტირის გამოყენება სარძევე ჯირკვლების მიდამოში,
ასევე ჰიპერემიულ, გაღიზიანებულ ან დაზიანებულ კანის მიდამოებზე.

ქალი უნდა დარწმუნდეს, რომ პლასტირი კარგად არის მიკრული კანზე. ასეთ შემთხვევაში, მუშაობის, ვარჯიშის, ცურვისა და შხაპის მიღების დროსაც კი არ არის მოცილების საშიშროება.
წებოვანი თვისებების შემცირების თავიდან ასაცილებლად, პლასტირის მიკვრის ადგილას არ უნდა გამოიყენოთ ადგილობრივი კოსმეტიკური პროდუქტები.

დადებითი მხარეებია:

ჰორმონალური პლასტირით სარგებლობისას, კვირაში მხოლოდ ერთხელ ფიქრობთ კონტრაცეფციაზე.
მისი გამოყენება არ არის რთული. ეს მეთოდი განსაკუთრებით შესაფერისია იმ ქალებისთვის, რომელთაც უჭირთ კონტრაცეპტიული აბების ყოველდღე მიღება, ბევრს მოგზაურობენ ან მუშაობენ არარეგულარული სამუშაო რეჯიმით.

ნეგატიური მხარეები:

ჰორმონალურ პლასტირს აქვს იგივე უარყოფითი გვერდითი მოვლენები, როგორც კომბინირებულ ჰორმონალურ აბებს.

გვერდითი ეფექტები შეიძლება იყოს:

ცენტრალური და პერიფერიული ნერვული სისტემის მხრივ: თავბრუსხვევა, შაკიკი, ემოციური ლაბილობა, დეპრესია, შფოთვა, უძილობა, ძილიანობა.
გულ-სისხლძარღვთა სისტემის მხრივ: არტერიული წნევის მომატება, გულისცემის სიხშირის მომატება, შეშუპება, ვარიკოზული ვენების გაგანიერება.
საჭმლის მომნელებელი სისტემის მხრივ: ანორექსია ან მადის მომატება, გასტრიტი, მუცლის ტკივილი, პირღებინება, დიარეა, მეტეორიზმი, ყაბზობა, ბუასილი.
სასუნთქი სისტემის მხრივ: ქოშინი.
რეპროდუქციული სისტემა: სქესობრივი აქტის დროს ტკივილი (დისპარეუნია), ვაგინიტი, დისმენორეა, ლიბიდოს შემცირება, მკერდის გადიდება, მენსტრუალური ციკლის დარღვევა (მათ შორის ინტერმენსტრუალური სისხლდენა, ჰიპერმენორეა), საშოს სეკრეციის ცვლილებები, საშვილოსნოს ყელის ლორწოს ცვლილებები.
კანის გაღიზიანება, გამონაყარი პლასტირის მოთავსების ადგილას.

გამოყენების უკუჩვენებები:

ვენური თრომბოზის ისტორია, ან თრომბოზის წინამორბედები (სტენოკარდიის ან ტრანზიტორული იშემიური შეტევის ჩათვლით);
არტერიული ჰიპერტენზია (160/100 მმ Hg- ზე მეტი), შაქრიანი დიაბეტი სისხლძარღვთა დაზიანებით;
წითელი მგლურა;
შაკიკი;
დადასტურებული ან საეჭვო მკერდის ონკოლოგიური დაავადება;
ესტროგენზე დამოკიდებული სიმსივნეები;
ღვიძლის ადენომა და კარცინომა;
სასქესო ორგანოებიდან სისხლდენა;
პოსტმენოპაუზის პერიოდი;
18 წლამდე ასაკის გოგონები;
მშობიარობის შემდგომი პერიოდი (4 კვირა);
ლაქტაციის პერიოდი;
მომატებული მგრძნობელობა პრეპარატის კომპონენტების მიმართ

ტრანსდერმალური კონტრაცეპტული სისტემის (TTS) გამოყენების დაწყებამდე, ან განახლებამდე, საჭიროა დეტალური სამედიცინო ისტორიის შეგროვება (ოჯახის ისტორიის ჩათვლით) და ორსულობის გამორიცხვა. უნდა გაიზომოს არტერიული წნევა და ჩატარდეს ფიზიკური გამოკვლევა უკუჩვენებების და გაფრთხილებების გათვალისწინებით.

ჰორმონალური კონტრაცეპციის მეთოდის შეწყვეტის შემდეგ, სასურველია ყველა ქალმა მიიღოს ფოლიუმის მჟავა.

 კომბინირებული პლასტირების გამოყენების დროს, სასურველია მზის, ან ხელოვნური ულტრაიისფერი სინათლის ზემოქმედებისგან თავის არიდება, ჰიპერპიგმენტაციის თავიდან აცილების მიზნით.

 ჰორმონალური კონტრაცეპტივები არ იცავს აივ-ინფექცია/შიდსგან და სხვა სქესობრივი გზით გადამდები დაავადებებისგან.
TTS– ს უსაფრთხოება და ეფექტურობა დადგენილია მხოლოდ 18 – დან 45 წლამდე ქალებისთვის.

გამოყენების შემდეგ, პლასტირი კვლავ შეიცავს აქტიური ინგრედიენტების მნიშვნელოვან რაოდენობას. ნარჩენი ჰორმონები წყალში მოხვდრისას, შეიძლება საზიანო იყოს გარემოსთვის, ამიტომ ის ფრთხილად უნდა იქნეს უტილიზებული.

ანტიბიოტიკები იწვევენ კონტრაცეპტული ეფექტის შემცირებას (ამპიცილინისა და ტეტრაციკლინის ჯგუფის ჩათვლით).

შენახვის პირობები:

პრეპარატი ინახება ბავშვებისთვის მიუწვდომელ ადგილას 15 ° –დან 25 ° C– მდე ტემპერატურაზე.
მეთოდით სარგებლობის წინ, აუცილებელია გავითვალისწინოთ, რომ საჭიროა ექიმთან კონსულტაცია. ამ გზით, შევამცირებთ გართულებებისა და გვერდითი ეფექტების რისკებს.